Shkëndija ka nisur lëvizjet në merkato, tashmë në hyrje, pasi më parë ishin zyrtarizuar largimet e Avdylit, Vujçiç dhe Çelikoviç.

Drejtuesit nuk kanë vonuar për të afruar tre lojtarë të tjerë dhe me shumë mundësi merkato e kuqezinjve tashmë është mbyllur, por nëse do të ketë ndonjë opsion të mirë, atëherë edhe mund të merret në konsideratë.

“Kryesia e klubit ka gjetur akordin për të angazhuar në skuadër Mevlan Adilin, Seladin Mustafin dhe Sabit Bilallin”, thuhet në njoftimin e klubit nga Tetova, që më tej shton:

“Mbrojtësi 23-vjeçar, Mevlan Adili, vjen nga FC UTA e Rumanisë, ndërsa praktikisht rikthehet te Shkëndija, ku ishte 6 muajt e parë të vitit 2015. Ai firmos për 18 muajt e ardhshëm dhe pritet të risë konkurrencën në repartin e mbrojtjes”.

“Portieri 24 vjeçar Seladin Mustafi ka nënshkruar për dy vite. Ka përvojë në Ligën e Parë të Maqedonisë, kur ka luajtur me Renovën, për të cilët përveç kampionatit ka regjistruar edhe dy paraqitje në eliminatoret e UEFA Europa League. Një periudhë të shkurtër ishte pjesë e Llapit në Kosovë, ndërsa sezonin e fundit luajti me Teteksin”.

“Ndërkohë, 20-vjeçari Sabit Bilalli luan si mesfushor ofensiv, në kategoritë e reja ka qenë pjesë e Renovës dhe Dinamo Zagrebit, ndërsa me Shkëndijën ka firmosur kontratë trevjeçare”.